Minniháttar frávik frá forsendum dreifigreiningar eru ekki talin alvarleg og því er hún tiltölulega traust úrvinnsluaðferð gagnvart höfnunarmistökum eða alfa-villu (líkunum á því að hafna núlltilgátu ef hún er rétt). Það er því í lagi þótt ekki sé sama staðalfrávikið í öllum hópunum og þó svo að dreifing villunnar sé ekki normal.

Brot á forsendunum eru alvarlegri gagnvart afköstum tölfræðiaðferðarinnar og þar getur skekkja í dreifingu, misleitni dreifingar og fráviksgildi í gögnum minnkað líkurnar á því að hafna núlltilgátu. Þess vegna er æskilegt þegar verið er að skipuleggja rannsóknir að gefa forsendum tölfræðiaðferðarinnar gaum og skoða hvort þær standist. Það er hægt með því að skoða gögnin og dreifingu þeirra á myndritum. Almennt er talið að dreifigreining er traust ef lögun villudreifingar er svipuð í öllum hópum, ef munur á staðalfrávikum hópa er ekki meiri en fjórfaldur og ef engir frávillingar eru í gögnum.

© 2003 Sigurlaug María Jónsdóttir