Model Summary

R: Margbreytu fylgnistuðull

Stuðullinn stendur fyrir fylgnina milli frum- og fylgibreytu. Fylgnin getur verið milli –1 og +1 en þar sem R er kvaðratrótin af R² er talan alltaf jákvæð sama hver stefna fylgninnar er. Því meira sem fylgnin nálgast 1 því sterkari eru tengslin milli breytnanna.

R Square: R² eða skýringarhlutfall

Stuðullinn gefur upplýsingar um það hlutfall sem frumbreytan skýrir í heildarbreytileika fylgibreytunnar. R² getur tekið gildi á bilinu 0 til 1. Ef líkan gefur fullkomna spá verður R² = 1 en nálægt 0 ef líkanið getur ekki spáð fyrir um Y að neinu leyti. Þegar R² = 1 er samband frum- og fylgibreytu algjörlega línulegt.

Túlkun: Í dæminu í töflunni hér að ofan sést að R² = 0,103. Þegar talan er margfölduð með 100 er útkoman sú að starfsaldur í mánuðum skýrir 10% af dreifingu launa.

R² má einnig reikna út frá upplýsingum í ANOVA töflunni. Þar eru gefnar upp heildarkvaðratsummur (TSS) og skýrð dreifni (RSS) en R² = RSS/TSS x 100.

St. Error of the estimate: Staðalvilla spágildis

Þessi staðalvilla er algengasta mælieining á villu í forspá og stendur fyrir dreifingu mæligilda í kringum spálínuna. Hún er gefur því til kynna hve vel spálínan fellur að gögnunum.

Túlkun: Hér er staðalvillan nokkuð há. Þegar miðað er við að mánaðarlaunin séu 79.736. kr. þá bendir staðalvillan hér (48.685. kr.) til þess að mikil villa sé í forspá um mánaðarlaun út frá starfsaldri í mánuði.

Staðalvillu spágildis má einnig reikna með því að draga kvaðratrótina af meðalkvaðrötum villunnar (MS. Residual) í ANOVA töflunni.

© 2003 Sigríður Karen Bárudóttir