Almennt um kassarit

Kassarit sýnir dreifingu breytu og er notað til að skoða staðsetningu, skekkju og fráviksgildi. Stærð kassans gefur til kynna breidd fyrir þann helming mæligilda sem er næstur miðju. Línan í kassanum sýnir miðju dreifingarinnar. Staðsetning línunnar í kassanum gefur til kynna ef miðjudreifingin er skekkt. Skeggin sýna breidd og lögun í hölum dreifingarinnar auk þess sem fráviksgildi eru sýnd með stjörnum og hringjum. Kassarit sýnir alla mikilvægustu eiginleika samfelldra dreifinga en henta síður fyrir rofnar breytur.

Til að skoða misleitni

Kassarit er öflugasta myndformið til að sýna misleitni dreifingar. Best er að nota krossuð kassarit (allar breyturnar inni) í þessum tilgangi. Þannig má skoða hvort breidd dreifingarinnar, þ.e. dreifing villunnar, sé sambærileg milli úrtakshópa. Ef svo er ekki er það vísbending um misleitni.

Dæmi:

Á mynd sem þessari er hægt að bera sjónrænt saman breidd dreifingar milli úrtakshópa. Líkt og sést á þessari mynd er breidd dreifingarinnar (dreifing villunnar) nokkuð sambærileg milli hópanna. Aftur á móti gefa litlu hringirnir þrír neðst á myndinni til kynna að dreifinginn innihaldi fráviksgildi. Kassaritið sýnir ekki með afgerandi hætti að dreifing villunnar sé laus við misleitni. Til að taka endanlega afstöðu til þess er nauðsynlegt að skoða staðalfrávikin og bera þau saman á milli hópa. Ef það stærsta er meira en tvisvar sinnum stærra en það minnsta bendir það til misleitni. Auk þess má styðjast við niðurstöður tölfræðiprófs á misleitni (Próf Levenes).

© 2004 Emilía Guðmundsdóttir