Markmið þessa verkefnis er að þú æfist í því að nota marghliða dreifigreiningu við úrvinnslu gagna. Miðað er við að þú hagnýti þér alla fyrri umfjöllun námskeiðsins og beiti þeim úrvinnsluaðferðum sem kynntar hafa verið.

Miðað er við að þú notir gagnasafnið Age and memory.

Skiladagur

Verkefninu skal skila í síðasta lagi við lok dags föstudagsins 17. desember næstkomandi á þjónustuborðið í Gimli eða inn um póstlúgu þjónustuborðsins. Skil miðast við að úrlausn verkefnis sé komið á þjónustuborðið fyrir opnun næsta virka dag á eftir, þ.e. fái dagstimpil miðað við 17. desember.

Miðað er við að tveir séu um hvert verkefni. Viðkomandi nemandi má ekki hafa unnið meira en eitt annað verkefni áður með þér í námskeiðinu.

Hægt er að sækja um framlengingu á skilafresti til loka þriðjudags 20. desember nk. Það er gert með því að senda tölvupóst til kennara námskeiðsins með efnistitlinum: Beiðni um framlengdan skilafrest í Tölfræði. Allar slíkar beiðnir sem berast með þessum hætti verða sjálfkrafa samþykktar enda berist þær fyrir lok 17. desember. Vinsamlega haldið þessum tölvuskeytum aðskildum frá öðrum erindum, því óvíst er um svar við þessum beiðnum og óvísst hvort efni viðkomandi skeytis verði lesið. Vegna kæfuvarna (spam) er þó ráðlegt að hafa einhvern texta í skeytinu.

Verkefnið

Þú þarft að vinna tvíhliða dreifigreiningu og skila greinargerð. Þetta þarf að vera dreifigreining með samanburðum, inngangi sem skýrir nálgunina og fullkominni túlkun. Meðal annars þarf að meta áhrifastærðir, afbrigði í gögnum og framkvæma afkastareikninga í því skyni að ráðleggja með úr­taks­stærð í nýrri rannsókn. Helstu eiginleika gagnanna þarf að birta myndrænt.

Hér er miðað við að þú framkvæmir allt það sem farið hefur verið í gegnum í námskeiðinu. Gögnin þarf að kanna, taka þarf afstöðu til þess hvaða spurninga skuli spurt um gögnin og vinna síðan úr þeim miðað við það.

Við erum að tala um fullkomna úrvinnslu með dreifigreiningu, samanburðum, áhrifastærðum og mati á afköstum. Ekki reikna eftir á afköst! Einnig þarf að leggja út af styrkleikum og veikleikum úrvinnslunnar og rannsóknarsniðsins. Í því felst m.a. að fjalla um hvernig staðið væri að verki ef verið væri að hanna nýja sams konar rannsókn þannig að afköst og önnur atriði sem skipta máli séu viðunandi.

Niðurstöður þarf m.a. að birta myndrænt eða á formi taflna eins og við getur átt. Val á slíkri framsetningu þarf að miðast við skýrleika gagnvart væntanlegum lesanda, þ.e. öðrum en kennara námskeiðsins. Verkefnið þarf því að vera skýrt og skiljanlegt án þess að slegið sé af fræðilegum kröfum.

Sem áður erum við að tala um fullkomna greinargerð á APA sniði, þ.e. með inngangi, aðferð, niðurstöðum og umræðu. Allar vísanir þurfa að vera til staðar og á réttu sniði og öll uppsetning m.a. á töflum og slíku verða að vera í smásmugulegu samræmi við APA-stíl.

Skil á verkefninu felur í sér (a) skil á verkefninu í ritaðri mynd sinni og (b) skil á skipanaskrá með tölvupósti sem sýnir ferilinn frá því að gögnin eru lesin inn og þar til úrvinnslu er lokið. [„Þar til úrvinnslan er framkvæmd“ þýðir hér að dreifigreiningarskipunin á einnig að vera í skipanaskránni!]

Skil í tölvupósti þarf að uppfylla eftirfarandi skilyrði:

• Efnistitill (subject) sé: Lokaverkefni: Marghliða dreifigreining
• Skipanaskrá sem keyrir án villna hjá kennara

Ég geri ráð fyrir því að greinargerð þín sé á hefðbundnu rannsóknargreinarsniði eftir því sem við getur átt. Einnig ber þér að fylgja APA stíl varðandi form og heimildarvísanir.

© 2001–2012 Guðmundur B. Arnkelsson (síðast breytt 22. nóvember 2012)