Tölfræði IIIPróflýsing haustið 2018

Eftirfarandi upplýsingar eru gefnar með venjulegum fyrirvara. Við samningu prófsins geta orðið breytingar frá neðangreindri lýsingu. Lýsingunni er þó ætlað að gefa sem réttasta mynd af prófinu og styðja þannig við þig í prófundirbúningnum.

Próftími

Samkvæmt upplýsingum frá prófstjóra hefst prófið stundvíslega kl. 900 og lýkur stundvíslega kl. 1200 miðvikudaginn 5. desember næstkomandi. Próftími er 3 klukkustundir. Staðfestu sjálf þessar upplýsingar með því að fara inn á vef Háskóla Íslands.

Prófstaður

Upplýsingar um prófstað og röðun í stofur birtast á sama stað degi fyrir prófið.

Próflýsing

Prófið er tvískipt. Annars vegar eru fyrirhugaðar 3 efnisspurningar og hins vegar um 20 fjölvalsspurningar. Efnisspurningar gilda samtals 60% af prófinu en fjölvalsspurningarnar 40%.

Krossaspurningarnar reyna ýmist á einfalda útreikninga, ályktanir á grunni þeirra, þekkingu eða skilning á námsefninu. Gott er að kynna sér formúluheftið vel. Þar finnurðu allar helstu formúlur þótt einhverjum einfaldari formúlum sé sleppt. Ég mæli með því að þú skoðir umfjöllun um formúluheftið í Spurðu og svöruðu um þær formúlur sem ekki eru í formúluheftinu.

Efnisspurningar geta tekið yfir mjög misjafnt efni. Þær geta verið beint úr bókinni, fyrirlestrum, umræðum í tíma, spurðu og svöruðu eða umræðuþráðum í Uglu. Þær geta kallað eftir staðreyndaþekkingu, skilningi, beitingu eða einföldum útreikningum. Í síðasttalda tilfellinu verða útreikningar þó það einfaldir að hægt er að setja gefnar upplýsingar beint inn í viðeigandi formúlur. Ég hvet þig til að skoða vel formúlu- og töfluhefti námskeiðsins til að sjá hvaða upplýsingar muni fylgja prófinu.

Efnisspurning getur verið stuttsvarsspurning, þ.e. spurning um afmarkað efni sem er hægt að svara í fáeinum setningum. Efnisspurning getur einnig falist í því að lýsa mynd eða töflu. Gamlar prófspurningar ættu að gefa góða mynd af efnisspurningum í prófinu.

Námsefni fyrir próf

Greinargóða lýsingu á námsefni má finna í námskeiðslýsingu námskeiðsins.

Hjálpartæki

Þú þarft að hafa með þér reiknivél og hafa öðlast nauðsynlega kunnáttu og þjálfun í notkun hennar. Reiknivélin þarf að geta reiknað kvaðratrót og sett tölur í annað veldi.

Önnur hjálpartæki eru óheimil. Sérstaklega skal tekið fram að óheimilt er að hafa kennslubækur, minnismiða, tímaglósur eða önnur slík gögn.

Með prófinu færðu mjög einfalt formúlu- og töfluhefti. Gert er ráð fyrir að þú hafir ýmsar einfaldar formúlur á valdi þínu aðrar en þær fáu sem eru í heftinu.

Vægi prófa og námskeiðseinkunn

Lokaprófið vegur 55% af lokaeinkunn námskeiðsins, skiladæmin 15% og skilaverkefnin 30%. Samtals vega því efnisspurningarnar á prófinu þriðjung (0,60 × 0,55=0,33) og fjölvalsspurningar rúman fimmtung (0,40 × 0,55= 0,22) af lokaeinkunn námskeiðsins.

Nákvæmari upplýsingar um þetta allt er að finna í námskeiðslýsingu námskeiðsins.

Gangi þér vel!