Með myndrænni framsetningu á gögnum er verið að sýna gögnin. Þannig er auðveldlega hægt að sjá eiginleika gagnanna ef rétt myndrit er valið. Vel valið myndrit getur því birt meiri upplýsingar um gögnin heldur en tjáð verður með mælitölum. Þannig lýsa mælitölur gögnunum með því að gefa eiginleika þeirra á formi talna. Slík lýsing gefur takmarkað yfirlit og aðeins ef mælitölur eru traustar og forsendur þeirra eru fyrir hendi.

Vel valið myndrit skiptir máli

Þannig getur vel valið myndrit birt meiri upplýsingar um gögnin heldur en tjáð verður með mælitölum og á mjög auðveldan hátt. Á mynd geta einnig birst mikilvæg tengsl eða eiginleikar sem hafa áhrif á úrvinnslu og val mælitalna. Myndrit eru þannig góð leið til þess að skoða lögun og breidd dreifingar, því á myndum verður það mun augljósara en mæligildi gefa sjálf til kynna. Fráviksgildi verða líka augljósari á mynd en með talnagildum og svo er einnig gott að teikna myndrit til að glöggva sig betur á þeim.

Dæmi um myndrit eru súlurit, punktaþéttnirit, línurit, stöplarit, kassarit, laufrit, normalrit og hlutfallstalnarit.

Hér eru nokkur dæmi um myndrit

Kassarit

Kassarit sýna vel skekkju í dreifingu og sýna útgildi greinilega. Það er grundvöllur að mörgum tilgátum að gögnin séu nokkurn veginn normaldreifð og kassarit getur hjálpað til við að álykta hvort svo sé. Þegar kassarit er teiknað er dreifingunni skipt upp í fjóra jafna hluta auk þess sem miðja hennar er fundin. Lengd kassans í kassaritinu innifelur þann helming dreifingarinnar sem er næst miðju en lægsti og hæsti fjórðungurinn eru utan við kassann. Lína er dregin þvert yfir kassann við miðju dreifingarinnar. Út frá sitt hvorum enda kassans ganga línur sem eru kallaðar skegg.

Krossuð kassarit

Krossuð kassarit eru ákjósanleg þegar það þarf að bera saman dreifingu tveggja eða fleiri hópa. Hægt er að sjá í hendingskasti helstu eiginleikana og hvort dreifingin sé ólík milli hópanna.

Línurit

Línurit eru yfirleitt notuð þegar sýna á meðaltöl eða aðrar mælitölur á staðsetningu. Þau má þó einnig nota til að sýna fjölda eða aðrar sviðaðar mælitölur.

Normalrit

Normalrit birtir mæligildi breytu sem fall af væntigildum normaldreifingar. Ef breytan normaldreifist, mynda mæligildin beina línu. Ef það er skekkja sést sveigbogi á normalritinu en rjáfur- og gólfáhrif gera tengslin s-laga.

© 2004 Helga Rúna Péturs