Hentug leið til að meta eiginleika gagna er að teikna myndrit þar sem lögun og breidd dreifingar verður augljósari en mælitölur gefa til kynna. Fráviksgildi verða líka augljósari á mynd en með talnagildum svo gott er að teikna myndrit til að glöggva sig betur á þeim. Best er að sjá fráviksgildi á kassariti, normalriti eða laufriti.

Laufrit sýnir einstök mæligildi og gott er að skoða þau þegar gagnasöfn eru lítil en jaðargildi eru auðkennd sérstaklega. Það verður þó alltaf að hafa í huga að jaðargildin eru ekki sjálfkrafa frávillingar.

Kassarit kasta upp fráviksgildum og þarf að meta hvort megi telja þau eðlileg jaðargildi normaldreifingar eða frávillinga. Það getur verið gott að skoða það í normalriti en þar birtist skekkja sem sveigja og frávillingar sjást ágætlega (þó ekki áberandi). Best er að skoða bæði kassarit og normalrit við mat frávillinga. Á myndinni hér að neðan er dæmi um kassarit þar sem má sjá hvernig eitt gildi sker sig frá hinum gildum gagnasafnsins.

© 2003 Elfa B. Hreinsdóttir