Fyrir utan staðalvillu meðaltala eru staðalvillur fyrir hallatölur og spágildi líka reiknaðar og í gegnum þær hafa frávillingar áhrif á traustleika niðurstaðna tölfræðiprófa. Aðfallsgreining er meðal annars notuð til að athuga hvort frumbreytur hafa áhrif á fylgibreytur. Hún er líka notuð til að athuga hve mikil áhrif breyting á frumbreytum hefur á fylgibreytu og til að spá fyrir um fylgibreytu útfrá frumbreytu. Ef mig langar að vita hvort nám hefur áhrif á tekjur, og hve mikil hugsanleg áhrif eru, get ég notað aðfallsgreiningu. Forsenda aðfallsgreiningar um einsleitni dreifingar er brostin ef frávillingar eru í gögnum vegna þess að þeir aflaga dreifingu og stækka staðalfrávik sem staðalvilla byggir á.

Hallastuðlar geta orðið öðruvísi ef öfgagildi eru í gagnasafni og gefa ranga mynd af mun milli gilda. Frávillingar geta haft þau áhrif í aðfallsgreiningu að spájafna gefur ranga forspá því þeir draga spána í átt að sér en frá öðrum gildum gagnasafns. Ef ég vil vita um áhrif náms á tekjur og er með ranga mynd af tekjum, vegna öfgagilda, verða upplýsingar sem aðfallsgreining gefur mér rangar.

Staðalfrávik segir til um fjarlægð punkta frá meðaltali og staðalvilla segir til um fjarlægð punkta frá spálínu. Eftir því sem staðalvilla spágildis er stærri verður skekkja í forspá meiri þar sem hún segir til um fjarlægð punkta frá spálínu. Munur á spágildi og raungildi eykst því með stækkandi staðalvillu.

© 2003 Elfa B. Hreinsdóttir