Aðferðafræði II 10.05.03

Spurningar og ábendingar um námskeiðið

Hér er að finna ýmsar spurningar og ábendingar sem borist hafa frá nemendum og lúta að fyrirkomulagi námskeiðsins og einstökum hlutum þess.

Að hluta eru þetta ábendingar sem komið hafa fram í samtölum við nemendur eða skriflegar ábendingar við lok námskeiðsins. Einnig eru hér fyrirspurnir sem hafa borist í gegnum Spurt og svarað og hafa verið taldar eiga heima hér.

Fyrirspurnum er oft lítillega breytt svo þær henti betur fyrir þennan miðill. Í öllum tilfellum er reynt að lagfæra stíl og stafsetningu eftir þörfum.

Skilgreiningar hugtaka

Væri hægt að skilgreina helstu hugtök eða jafnvel birta hugtakalista á vefnum með skilgreiningum og stuttri umfjöllun um hvert hugtak?

Slíkar skilgreiningar og ítarlegar orðskýringar er að finna í Orðgnótt en hún fæst meðal annars í Bóksölu stúdenta. Þar er að finna skilgreiningar á öllum helstu hugtökum sem koma fyrir í Aðferðafræði I og Aðferðafræði II. Reynt er að hafa skýringarnar í knöppu máli en þó hæfilega ítarlegar. Miðað er við að hægt sé að lesa hugtökin í samhengi með því að fylgja millivísunum. Þannig á t.d. að vera hægt að byrja á hugtakinu statistical test og með því að fylgja millivísunum er maður á endanum búinn að kynnast öllum helstu hugtökum í ályktunartölfræði.

Miðað við þá vinnu sem felst í Orðgnótt er ekki við því að búast að gerður sé annar sambærilegur listi hugtaka og orðskýringa.

2001-04-02f GBA

Innihald fyrirlestra

Mér finnst stundum vanta upplýsingar í fyrirlestrana til að auðvelda mér að tengja efnið við raunveruleikann. Mætti ekki leggja meiri áherslu á samantekt. Þannig mætti byrja alla fyrirlestra á því að segja frá því sem þeir fjalla um, útskýra hvenær efninu (t.d. mælitölum) er beitt og koma með dæmi um hagnýtingu þess. Ég held að þetta myndi hjálpa mér mikið að tengja efnið og þar með myndi það vekja meiri áhuga hjá mér. Þegar ég les bókina vantar mig oft góð raunveruleg dæmi um efnið.

Glærurnar eru ágætar en mættu innihalda frekari skýringar á efninu. Það var t.d. vel til fundið að tengja einstakar glærur beint inn á viðkomandi stoðefni (t.d. Spurt og svarað) eins og gert var í einum fyrirlestri.

Þetta er nákvæmlega það sem er ráðgert í námskeiðinu og því er ábendingin vel þegin. Þetta er hins vegar mjög mikil vinna sem hlýtur að dreifast á þó nokkur ár. Þetta er einnig töluvert kostnaðarmál. Hraði breytinga fer því að verulegu leyti eftir því hversu vel félagsvísindadeild styður við námskeiðið og þær breytingar sem fyrirhugaðar eru.

Við ráðgerum að safna dæmum um notkun þeirra aðferða sem kenndar eru í Aðferðafræði II við raunveruleg viðfangsefni. Við getum hugsað okkur að við séum að fjalla um öryggisbil. Þá gætir þú flett upp öryggisbilum og séð dæmi um rannsóknir sem hafa notað öryggisbil, hvernig þau voru túlkuð í rannsókninni og nálgast gögn rannsóknarinnar og notað þau til reikna sjálf út viðkomandi niðurstöður. Ef vel tekst til myndir þú geta nálgast slík dæmi fyrir þína eigin fræðigrein. Á sama hátt væri hægt að byrja fyrirlestur dæmum um úr íslenskum rannsóknum, t.d. sem yfirlitsglæru í upphafi fyrirlesturs.

Á sama hátt viljum við þróa efni í kringum fyrirlestrana þar sem fjallað væri ítarlega um ákveðin efni tengd fyrirlestrunum. Það mætti hugsa sér tengingar úr glærunum yfir í bæði spurningar í Spurt og svarað og ítarefni þar sem fjallað væri nánar um efni glæranna.

Ekkert af þessu gerist sjálfkrafa og allt krefst þetta mikillar vinnu og ákveðins tíma. Fyrstu skrefin sástu í glærunum fyrir Sveigfylgni og tenginguna við forritlingin í Öryggisbilum. Framtíðin leiðir svo í ljós hvernig útfærslan verður.

2001-04-02e GBA

Tímasókn í námskeiðinu

Mér finnst allt of mikil tímasókn í námskeiðinu. Þetta var í lagi í byrjun en þegar tölvukennslan byrjaði voru þetta fimm fyrirlestrar, tveir aðstoðartímar og tveir tölvutímar í hverri viku.

Ætti námskeiðið ekki að vera fleiri einingar miðað við tímaskyldu?

Tímasóknin er mikil í námskeiðinu. Þú þarft þó að hafa í huga að ýmsir hlutar námskeiðsins eru valfrjálsir. Þannig ræður þú hvort þú hagnýtir þér aðstoðartímanna og hvort þú velur að skila heimaverkefnum. Þessir hlutar námskeiðsins eru til að styðja við þig í náminu og því ekki skylda.

Til álita koma því aðeins fyrirlestrarnir og tölvutímarnir. Þær sex vikur sem tölvukennslan stendur yfir er eðlilega mikil vinna í námskeiðinu. Gleymdu því samt ekki að fyrirlestrum lýkur snemma á misserinu.

Það er einnig mikil vinna í öðrum námskeiðum og gjarnan mikil skylduskil verkefna. Í Aðferðafræði II hefur kennslumagnið verið þetta mikið til margra ára.

Einingafjöldi námskeiðsins og hinn almenni rammi námskeiðsins er ekki á minni könnu heldur tek ég einfaldlega við námskeiðinu svona. Námskeiðið fjallar hins vegar um mikilvægt efni og því eðlilegt að það taki umtalsverðum tíma hjá nemendum.

2001-04-02d GBA

Væri hægt að birta glærurnar á öðru formi?

Það væri betra að geta prentað glærurnar út í PowerPoint því þá væri hægt að setja fjórar glærur á hvert blað. Það er allt of mikil eyðsla á pappír og prentkvóta að prenta eina glæru á hverja blaðsíðu. Auk þess ráða venjulegar heimilistölvur eins og ég er með illa við þetta Acrobat form.

Einnig væri gott að geta keypt hefti með glærunum í stað þess að prenta þær sjálfur út.

Ég hef sjálfur haft gamla tölvu með lítið afl. Ég hef lent í erfiðleikum við að opna þung Acrobat-skjöl en einnig lent í miklum erfiðleikum við PowerPoint skjöl. Ég hef t.d. asnast til að opna PowerPoint-skjal frá virtum samkennara til þess eins að sjá tölvuna mína við það að bugast við að teikna flókin bakgrunn meðan ég tromma með fingrum á borðplötuna. Það er því fjarri því sjálfgefið að hægar tölvur ráði betur við PowerPoint heldur en Acrobat.

Í mörgum tilfellum skilar Acrobat minni skjölum en PowerPoint. Í sumum tilfellum eru glærurnar sem þið fáið á Acrobat-formi aðeins fjórðungurinn af stærð þeirra PowerPoint-skjala sem þau eru byggð á. Í öðrum tilfellum eru Acrobat-skjölin lítið eitt stærri. Í heildina tekið gæti verið að umtalsverður tengitími sparist í Aðferðafræði II vegna notkunar á Acrobat í stað PowerPoint.

Kosturinn við Acrobat er sá að þið sjáið nákvæmlega það sama og ég án þess að þurfa að hafa sama hugbúnað og ég hef. Ég get því notað hvaða forrit sem er til að búa til skjalið án þess að þurfa að hafa áhyggjur af því hvort nemendur hafi forritið líka. Það hafa fráleitt allir nemendur aðgang að PowerPoint.

Varðandi útprentun á glærum, þá er sá möguleiki í öllum nýlegri prentarareklum að prenta fleiri en eina blaðsíðu á hvert prentað blað. Ef þú ert í O-102 skaltu prófa að fara í File/Print og ýta þar á takkann Properties, en hann á að vera efst til vinstri ég prentglugganum. Þá kemur upp nýr gluggi með tveimur flipum þar sem þú velur Advanced flipann. Þar ferðu niður í listanum þar til þú finnur valkostinn Pages per Sheet. Þú smellir á þennan valkost, tilgreinir þann fjölda blaðsíðna sem þú vilt að prentist á hvert blað og smellir síðan á OK. Síðan ættir þú að geta prentað af hjartans lyst.

Til samanburðar er ég með HP DeskJet prentara. Þar fer ég í Properties og vel þar Layout- flipann og vel þar þann fjölda blaðsíðna sem á að fara á hvert blað í fellilista sem er auðkenndur með Pages Per Sheet.

Hver prentaraframleiðandi hefur sína aðferð til að gefa aðgang að þessum möguleika. Það þarf því að fara í File/Print/Properties og leita. Þessi möguleiki ætti að finnast í öllum nýlegum prenturum. Að öðrum kosti er það ráð að fara á heimasíðu framleiðandans og sækja nýjasta prentararekilinn fyrir viðkomandi prentara.

Prentgarður-Háskólafjölritun hefur annast útprentun á glærum og öðrum gögnum af heimasíðunni. Einhver misbrestur var þó á þessari þjónustu hjá þeim. Þegar ég talaði við þá um mitt misserið virtist mér að það væri komið í lag. Það er þó á endanum á þeirra ábyrgð hvort og hvernig þeir þjónusta heimasíður námskeiðsins.

2001-04-02c GBA

Fyrirkomulag aðstoðartíma

Væri hægt að hafa annað form á aðstoðartímunum? Það mætti t.d. taka dæmi fyrir uppi á töflu því margir eru að glíma við sömu vandamálin. Ég vildi gjarnan sjá farið yfir dæmi í upphafi hvers tíma. Þetta myndi hjálpa mikið því flestir eru með sömu spurningarnar.

Hvernig væri líka að hafa umræðu- eða fyrirspurnatíma samhliða aðstoðartímunum?

Við munum taka aðstoðartíma til skoðunar á næsta misseri. Í vetur var Dæmakverinu breytt verulega. Hluti þeirra breytinga var að gefa milliniðurstöður fyrir sem flest verkefni. Þar með létti mikið á aðstoðartímum og aðsókn að þeim minnkaði. Einhverjir hafa samt kvartað yfir því að hafa ekki komist að en það hlýtur þá að hafa verið á álagstímum í vikunni fyrir próf.

Nýtt fyrirkomulag getur falist í námsefni fyrir aðstoðartímana, lítillega breyttum aðferðum eins og þú gerir tillögur um eða aðrar breytingar á fyrirkomulagi. Allar ábendingar eru vel þegnar.

2001-04-02b GBA

Tímasetningar fyrirlestra og aðstoðartíma

Aðstoðartímarnir eru á mjög vondum tímum, of seint á daginn. Ég er með ungt barn og hef ekki pössun á þessum tíma. Ég get því ekki nýtt mér þá.

Fyrirlestrarnir eru líka allt of snemma. Ung börn mæta yfirleitt ekki fyrr en kl. 9 í skólann. Þess vegna er mjög erfitt fyrir mig að mæta svona snemma á morgnanna.

Ég skil þinn vanda vel. Margir kvarta yfir því að fyrirlestrar séu of snemma og ekki aðeins þeir sem eru með börn. Ég geri hins vegar ráð fyrir að þeim tímasetningum verði ekki breytt einfaldlega vegna þess að kennsluhúsnæðið þarf að nýta allan daginn og því þurfa einhverjir að vera þetta snemma.

Við höfum verið í erfiðleikum með að fá stofur sem henta aðstoðartímum fyrr á daginn auk þess sem við þurfum að finna tíma sem hentar nemendur í öllum greinum félagsvísindadeildar. Það er þó sjálfsagt að leitast við að hafa einhverja af aðstoðartímunum fyrr á daginn. Það verður þó að koma í ljós á næsta kennsluári hvort það tekst.

2001-04-02a GBA